Інфармацыйна-аналітычнае ўпраўленне
Паштовы адрас:
вул. Савецкая, 11, 220010, г. Мінск, Рэспубліка Беларусь
Факс: +375 (17) 222-32-13
Тел.: +375 (17) 222-64-75
Электронная пошта:
inform@house.gov.by
Дэпутаты адзначаюць несуразмернасць адказнасці некаторым адміністрацыйным правапарушэнням
7 лютага 2020, 15:53
7 лютага, Мінск /Кар. БЕЛТА/. Дэпутаты звяртаюць увагу на несуразмернасць адміністрацыйнай адказнасці некаторым правапарушэнням. Аб гэтым паведаміў карэспандэнту БЕЛТА намеснік старшыні Палаты прадстаўнікоў Нацыянальнага сходу, старшыня Беларускага рэспубліканскага саюза юрыстаў Валерый Міцкевіч.
"Усе дэпутаты вельмі актыўна ўключаны ў гэту работу (па ўдасканаленні мер адміністрацыйнай адказнасці. - Заўвага БЕЛТА). Выязджаючы ў свае выбарчыя акругі, яны атрымліваюць зваротную сувязь ад грамадзян, бізнесу, мясцовых органаў улады. Паступаюць розныя прапановы, зыходзячы з рэальнага, паўсядзённага жыцця", - сказаў Валерый Міцкевіч.
Сярод іншага дэпутаты ставяць пытанне аб несуразмернасці адказнасці ўчыненым дзеянням. Напрыклад, людзі на ўслеску, паблізу дачных участкаў абсталявалі месца адпачынку, паставілі лаўку. Аднак за знішчэнне лясной падсцілкі, урадлівага слоя глебы адпаведны кантралюючы орган можа накласці штраф. "Тая шкода, якая нанесена ў гэтым выпадку, на думку дэпутатаў, не адпавядае адказнасці. Такіх прыкладаў даволі шмат, - сказаў Валерый Міцкевіч. - Ёсць прапановы і па ўзмацненні адказнасці. Іх неабходна абмяркоўваць, таму што жыццё разнастайнае. Чакаецца вельмі вострая дыскусія".
Распараджэннем Прэзідэнта Беларусі ад 17 снежня 2019 года нумар 247рп для падрыхтоўкі комплексных прапаноў па карэкціроўцы Кодэкса аб адміністрацыйных правапарушэннях створана міжведамасная экспертная камісія. У яе склад увайшлі работнікі Вярхоўнага і Канстытуцыйнага судоў, Генеральнай пракуратуры, Камітэта дзяржаўнага кантролю, міністэрстваў юстыцыі, унутраных спраў, па падатках і зборах, іншых ведамстваў, прадстаўнікі парламента, а таксама навуковай супольнасці.
Камісія прадаўжае вывучаць меркаванні дзяржаўных органаў і арганізацый, якія ўпаўнаважаны складаць пратаколы і разглядаць справы аб адміністрацыйных правапарушэннях або з'яўляюцца рэгулятарамі адпаведных грамадскіх адносін, а таксама грамадзян і суб'ектаў гаспадарання. Так, Нацыянальны цэнтр прававой інфармацыі, Палата прадстаўнікоў збіралі пажаданні і прапановы людзей.
Паводле слоў Валерыя Міцкевіча, паступіла вельмі шмат прапаноў - ад лібералізацыі адказнасці да ўзмацнення пэўных яе відаў, увядзення новых. "Магчыма, будуць новыя падыходы, зыходзячы са ступені грамадскай значнасці тых ці іншых праваадносін", - сказаў ён.
Як паведамлялася, 16 снежня 2019 года Прэзідэнт Аляксандр Лукашэнка правёў нараду па пытаннях прымянення мер адміністрацыйнай адказнасці. Кіраўнік дзяржавы тады падкрэсліў, што галоўным крытэрыем работы павінна быць не колькасць выяўленых парушэнняў і выпісаных штрафаў, а прафілактычнае ўздзеянне і рэальнае скарачэнне адміністрацыйных праступкаў.
Усе інтэрв'ю