16 кастрычніка 2018 года, трэцяе пасяджэнне Палаты прадстаўнікоў Нацыянальнага сходу Рэспублікі Беларусь шостага склікання

У ходзе пасяджэння парламентарыі разгледзелі 10 пытанняў. У першым чытанні прыняты тры законапраекты.

Старшыня Дзяржаўнага пагранічнага камітэта Рэспублікі Беларусь Лапо А.П. далажыў аб праекце Закона «Аб змяненні законаў па пытаннях арганізацыі пагранічнай бяспекі» (судакладчык — намеснік старшыні Пастаяннай камісіі Палаты прадстаўнікоў па нацыянальнай бяспецы Базанаў У.А.).

Праектам Закона ўносяцца дапаўненні і змяненні ў чатыры законы: «Аб Дзяржаўнай граніцы Рэспублікі Беларусь», «Аб органах пагранічнай службы Рэспублікі Беларусь», «Аб парадку выезду з Рэспублікі Беларусь і ўезду ў Рэспубліку Беларусь грамадзян Рэспублікі Беларусь» і «Аб прававым становішчы замежных грамадзян і асоб без грамадзянства ў Рэспубліцы Беларусь».

Законапраектам, у прыватнасці, прапануецца:

дапоўніць Закон «Аб Дзяржаўнай граніцы Рэспублікі Беларусь» тэрмінамі «аўтаматычныя сродкі пагранічнага кантролю», «персанальныя дадзеныя фізічнай асобы» і іх азначэннямі, а таксама ўдакладніць паняцці некаторых іншых тэрмінаў, якія ўжываюцца ў Законе;

адмяніць дзяржаўную пошліну за ўезд (уваход), часовае знаходжанне і перамяшчэнне на працягу аднаго года ў пагранічнай зоне для грамадзян Рэспублікі Беларусь, а таксама замежных грамадзян і асоб без грамадзянства, якія пастаянна пражываюць у Рэспубліцы Беларусь;

устанавіць дзяржаўную пошліну за выдачу пропускаў на права ўезду (уваходу), часовага знаходжання, перамяшчэння ў пагранічнай паласе;

пашырыць пералік дакументаў, на падставе якіх грамадзяне маюць права знаходзіцца ў межах пагранічнай зоны;

удасканаленне парадку наведвання пагранічнай зоны і пагранічнай паласы фізічнымі асобамі, транзітнага праезду (транзіту) замежнікаў праз памежную зону;

надзяліць юрыдычных асоб і індывідуальных прадпрымальнікаў, якія ажыццяўляюць міжнародныя перавозкі пасажыраў, правам на збор, апрацоўку, захоўванне і выкарыстанне персанальных дадзеных пасажыраў без іх пісьмовай згоды;

у Законе «Аб органах пагранічнай службы Рэспублікі Беларусь» удакладніць паўнамоцтвы Дзяржаўнага пагранічнага камітэта Рэспублікі Беларусь, звязаныя з ажыццяўленнем мытнымі органамі асобных функцый органаў пагранічнай службы ў пунктах пропуску, вызначаных Саветам Міністраў Рэспублікі Беларусь, арганізацыяй пропуску праз Дзяржаўную граніцу тавараў у пунктах спрошчанага пропуску, арганізацыяй у пунктах пропуску санітарна-каранціннага кантролю фізічных асоб у частцы візуальнага агляду і, пры неабходнасці, апытанне аб стане іх здароўя, заканадаўчым замацаваннем права на выкарыстанне персанальных дадзеных фізічных асоб без іх пісьмовай згоды, прыняццем рашэнняў аб выкарыстанні аўтаматычных сродкаў пагранічнага кантролю, удасканаленнем парадку знаходжання фізічных асоб у пагранічнай зоне і пагранічнай паласе;

надзяліць мытныя органы паўнамоцтвамі на ажыццяўленне некаторых функцый органаў пагранічнай службы ў асобных пунктах пропуску.

З дакладамі па праекце Закона «Аб змяненні Закона Рэспублікі Беларусь «Аб дапаможных рэпрадуктыўных тэхналогіях» выступілі Міністр аховы здароўя Рэспублікі Беларусь Малашка В.А. і член Пастаяннай камісіі Палаты прадстаўнікоў па ахове здароўя, фізічнай культуры, сямейнай і маладзёжнай палітыцы Старавойтаў А.Г.

Праектам Закона прапануецца ўдакладніць парадак і ўмовы прымянення дапаможных рэпрадуктыўных тэхналогій, канкрэтызаваць патрабаванні, што прад’яўляюцца да донараў палавых клетак і сурагатнай маці, дэталізаваць палажэнні, якія тычацца стварэння адзінага рэгістра донараў палавых клетак.

Разам з гэтым законапраект прадугледжвае прадастаўленне права асобам, якія не маюць медыцынскіх паказанняў да ўжывання дапаможных рэпрадуктыўных тэхналогій, на захоўванне палавых клетак, рэгуляванне пытанняў міжнароднага супрацоўніцтва і ўстанаўленне адказнасці за парушэнне заканадаўства аб дапаможных рэпрадуктыўных тэхналогіях.

В.А.Малашка таксама прадставіў праект Закона «Аб змяненні Закона Рэспублікі Беларусь «Аб трансплантацыі органаў і тканак чалавека». Яго інфармацыю ў сваім выступленні дапоўніла член Пастаяннай камісіі Палаты прадстаўнікоў па ахове здароўя, фізічнай культуры, сямейнай і маладзежнай палітыцы Астапюк А.І.

Законапраектам прапануецца пашырыць кола асоб, якія адносяцца да патэнцыйных жывых роднасных донараў, уключыўшы ў яго не толькі сваякоў першай і другой ступені сваяцтва, але і асоб, якія знаходзяцца ў кроўным сваяцтве, якія маюць агульных продкаў да прадзеда і прабабкі ўключна.

Прадугледжваецца ўвядзенне паняцця крыжаванай трансплантацыі, што дазволіць вырашыць праблемы, якія ўзнікаюць пры генетычнай несумяшчальнасці паміж донарам і рэцыпіентам.

Разам з гэтым праект Закона дапаўняецца палажэннем, згодна з якім для ажыццяўлення міжнароднага супрацоўніцтва ў галіне абмену органамі і тканкамі чалавека на бязвыплатнай аснове Міністэрству аховы здароўя Рэспублікі Беларусь надаецца права прыняцця рашэння аб неабходнасці ўвозу ў Рэспубліку Беларусь і вывазу з Рэспублікі Беларусь органаў і тканак чалавека на бязвыплатнай аснове ў мэтах аптымальнага падбору пар донар-рэцыпіент. Пры гэтым устанаўліваецца, што такі ўвоз і вываз органаў і тканак чалавека для правядзення трансплантацыі ажыццяўляецца з улікам патрабаванняў, устаноўленых заканадаўствам Рэспублікі Беларусь, міжнароднымі дагаворамі, актамі, што складаюць права Еўразійскага эканамічнага саюза.

Акрамя таго, законапраектам замацоўваецца абавязковае пісьмовае паведамленне дзяржаўнай арганізацыі аховы здароўя аб маючым адбыцца заборы органаў для трансплантацыі ў жывога донара ў адпаведныя органы ўнутраных спраў, прадугледжваецца магчымасць адклікання пісьмовай заявы аб нязгодзе на забор органаў для трансплантацыі пасля смерці, устанаўліваецца пералік асоб, якія маюць права адклікаць такую заяву, вызначаецца парадак падачы такой заявы і парадак выключэння адпаведнай інфармацыі з Адзінага рэгістра трансплантацыі, а таксама пашыраецца пералік звестак, якія ўключаюцца ў Адзіны рэгістр трансплантацыі.

Дэпутаты прынялі ў другім чытанні праект Закона «Аб асабліва ахоўных прыродных тэрыторыях», які прадставіла старшыня Пастаяннай камісіі Палаты прадстаўнікоў па пытаннях экалогіі, прыродакарыстання і чарнобыльскай катастрофы Кананчук Т.П.

Парламентарый падкрэсліла, што законапраект максімальна напоўнены нормамі прамога дзеяння і змяшчае ўніверсальныя механізмы планавання развіцця сістэмы асабліва ахоўных прыродных тэрыторый, падрыхтоўкі навуковага і тэхніка-эканамічнага абгрунтавання іх абвяшчэння, пераўтварэння і спынення функцыянавання, распрацоўкі планаў кіравання імі, правядзення комплекснага маніторынгу экасістэм на ААПТ, якія спрыяюць дасягненню адной з Мэт устойлівага развіцця, выкладзеных у Парадку дня ў галіне ўстойлівага развіцця на перыяд да 2030 года, прынятай сусветнымі лідарамі на саміце Арганізацыі Аб’яднаных Нацый 25 верасня 2015 года: абарона і аднаўленне экасістэм сушы і садзейнічанне іх рацыянальнаму выкарыстанню, рацыянальнае лесакарыстанне, барацьба з апустыньваннем, спыненне і паварочванне назад працэсу дэградацыі зямель і спыненне працэсу страты біяразнастайнасці.

Праектам Закона прадугледжваецца карэкціроўка азначэнняў тэрмінаў «запаведнік», «нацыянальны парк», «заказнік» і «помнік прыроды», «асабліва ахоўныя прыродныя тэрыторыі», «ахова ААПТ», увядзенне азначэння паняцця «каштоўныя прыродныя комплексы і аб’екты».

Прапануецца змяніць класіфікацыю ААПТ у частцы ліквідацыі падзелу заказнікаў на віды.

У мэтах выканання патрабавання аб устанаўленні на ўзроўні заканадаўчых актаў абмежаванняў і забарон на ажыццяўленне гаспадарчай i iншай дзейнасцi прыродакарыстання праектам Закона прадугледжаны пералік неабходных абмежаванняў і забарон, якія забяспечваюць ахову каштоўных прыродных комплексаў і аб’ектаў, размешчаных на ААПТ. Шэраг з іх устанаўліваецца на ўсёй тэрыторыі ААПТ, а па асобных абмежаваннях і забаронах прадастаўляецца права дзяржаўным органам, якія прымаюць рашэнне аб абвяшчэнні, пераўтварэнні ААПТ, вызначыць участкі ААПТ, на якіх яны будуць дзейнічаць. Пры гэтым прапануецца прадугледзець норму, якая дае права дзяржаўным органам, што прымаюць рашэнне аб абвяшчэнні або пераўтварэнні ААПТ, устанаўліваць у мэтах забеспячэння захаванасці каштоўных прыродных комплексаў і аб’ектаў дадатковыя абмежаванні і забароны на ажыццяўленне гаспадарчай i iншай дзейнасцi ў выпадках абгрунтаванай неабходнасці, указанай у навуковым і тэхніка-эканамічным абгрунтаванні абвяшчэння, пераўтварэння ААПТ.

Законапраектам прадугледжваецца выключэнне шэрагу дублюючых норм. У прыватнасці, аб’ядноўваюцца ў адзін артыкул артыкулы па абвяшчэнні ААПТ, па асаблівасцях прававога становішча ААПТ, а таксама па кіраванні ААПТ.

У мэтах скарачэння расходаў бюджэтных сродкаў і павышэння эфектыўнасці іх выкарыстання праектам Закона прадугледжваецца магчымасць стварэння дзяржаўных прыродаахоўных устаноў для кіравання некалькімі ААПТ, незалежна ад іх катэгорыі, віду і статусу.

Акрамя таго, прадугледжаны шэраг артыкулаў, якія забяспечваюць напаўненне дзеючага Закона нормамі прамога дзеяння, якія рэгламентуюць:

крытэрыі выбару прыродных тэрыторый для абвяшчэння iх ААПТ;

падрыхтоўку навуковага і тэхніка-эканамічнага абгрунтавання абвяшчэння, пераўтварэння і спынення функцыянавання ААПТ, у тым ліку пералік работ, якія неабходна выканаць для падрыхтоўкі такога абгрунтавання, пералік частак, якія павінна ўтрымліваць абгрунтаванне і пералік дакументаў, якія да яго прыкладаюцца;

змест планаў кіравання ААПТ і парадак іх падрыхтоўкі і зацвярджэння;

правядзенне комплекснага маніторынгу экасістэм на ААПТ;

вядзенне рэестра асабліва ахоўных прыродных тэрыторый Рэспублікі Беларусь і выкарыстанне яго дадзеных, у тым ліку парадак прадастаўлення зацікаўленым асобам інфармацыі, якая змяшчаецца ў рэестры.

У ходзе пасяджэння былі прыняты пяць законапраектаў аб ратыфікацыі міжнародных пагадненняў.

З дакладам па праекце Закона «Аб ратыфікацыі Дагавора паміж Рэспублікай Беларусь і Чэшскай Рэспублікай аб пенсійным забеспячэнні» выступіла Міністр працы і сацыяльнай абароны Рэспублікі Беларусь Касцевіч І.А., з судакладам — член Пастаяннай камісіі Палаты прадстаўнікоў па працы і сацыяльных пытаннях Дашко А.М.

Асноўнай мэтай Дагавора з’яўляецца ўрэгуляванне пытанняў пенсійнага забеспячэння грамадзян Рэспублікі Беларусь і грамадзян Чэшскай Рэспублікі, якія працавалі за межамі сваіх дзяржаў. Дагавор заснаваны на прапарцыйным прынцыпе, калі пенсія прызначаецца і выплачваецца кожнай дзяржавай за перыяды стажу, набытага на яго тэрыторыі.

Аб праекце Закона «Аб ратыфікацыі Пратакола аб унясенні змянення ў Дагавор аб Еўразійскім эканамічным саюзе ад 29 мая 2014 года» далажыў першы намеснік Міністра замежных спраў Рэспублікі Беларусь Еўдачэнка А.А. (судакладчык — намеснік старшыні Пастаяннай камісіі Палаты прадстаўнікоў па міжнародных справах Корж І.А.).

Структурна Пратакол складаецца з двух артыкулаў. Артыкулам 1 Пратакола прапануецца ўнесці змяненне ў пункт 2 артыкула 10 Дагавора ў частцы ўстанаўлення магчымасці ўдзелу ў рабоце Вышэйшага савета не толькі кіраўнікоў дзяржаў, але і кіраўнікоў урадаў дзяржаў — членаў, калі ў адпаведнасці з заканадаўствам сваёй дзяржавы яны надзелены паўнамоцтвамі прымаць рашэнні па пытаннях, якія ўваходзяць у кампетэнцыю Вышэйшага савета.

Згодна з артыкулам 2 Пратакола ён уступае ў сілу з даты атрымання дэпазітарыем па дыпламатычных каналах апошняга пісьмовага паведамлення аб выкананні дзяржавамі — членамі бакоў унутрыдзяржаўных працэдур, неабходных для ўступлення Пратакола ў сілу.

Старшыня Дзяржаўнага камітэта па навуцы і тэхналогіях Рэспублікі Беларусь Шумілін А.Г. і член Пастаяннай камісіі Палаты прадстаўнікоў па адукацыі, культуры і навуцы Дарафеева І.А. прадставілі праект Закона «Аб ратыфікацыі Пагаднення аб парадку кіравання аўтарскімі і сумежнымі правамі на калектыўнай аснове».

Пагадненне накіравана на ўстанаўленне на еўразійскай прасторы адзінага парадку кіравання аўтарскімі і сумежнымі правамі на калектыўнай аснове і прадугледжвае:

гарманізацыю функцый і асноўных прынцыпаў дзейнасці арганізацый па калектыўным кіраванні маёмаснымі правамі, парадку іх узаемадзеяння з аўтарамі і іншымі праваўладальнікамі і карыстальнікамі аб’ектаў аўтарскага права або сумежных правоў;

правядзенне незалежнага аўдыту арганізацый па калектыўным кіраванні маёмаснымі правамі для праверкі і пацвярджэння дакладнасці бухгалтарскай (фінансавай) справаздачнасці;

устанаўленне адзіных патрабаванняў да перыядычнасці размеркавання арганізацыямі па калектыўным кіраванні маёмаснымі правамі сабранага ўзнагароджання паміж праваўладальнікамі (не радзей за адзін раз у год) і максімальны памер утрыманняў ад сумы сабранага ўзнагароджання (у памеры не больш за 50 працэнтаў) на ўласныя выдаткі і іншыя мэты;

неабходнасць устанаўлення ў нацыянальным заканадаўстве адказнасці арганізацый па калектыўным кіраванні маёмаснымі правамі за нявыплату праваўладальніку сабранага ўзнагароджання з прычыны парушэння парадку кіравання правамі, перавышэнне названымі арганізацыямі гранiчнага памеру ўтрыманняў з сумы сабранага ўзнагароджання на ўласныя выдаткі і іншыя мэты, а таксама невыкананне абавязацельстваў па правядзенні абавязковага аўдыту.

Дзяржаўным органам Рэспублікі Беларусь, адказным за рэалізацыю Пагаднення, вызначаны Дзяржаўны камітэт па навуцы і тэхналогіях Рэспублікі Беларусь.

Намеснік Міністра замежных спраў Рэспублікі Беларусь Шастакоў Я.А. прадставіў два законапраекты: «Аб ратыфікацыі Пагаднення паміж Урадам Рэспублікі Беларусь і Урадам Грузіі аб узаемных бязвізавых паездках грамадзян» (судакладчык — член Пастаяннай камісіі Палаты прадстаўнікоў па бюджэце і фінансах Сайганова Т.І.) і «Аб ратыфікацыі Пагаднення паміж Урадам Рэспублікі Беларусь і Урадам Алжырскай Народнай Дэмакратычнай Рэспублікі аб адмене віз для ўладальнікаў дыпламатычных і службовых (афіцыйных) пашпартоў» (судакладчык — член Пастаяннай камісіі Палаты прадстаўнікоў па дзяржаўным будаўніцтве, мясцовым самакіраванні і рэгламенце Ждановіч П.Л.).

Пагадненне памiж Урадам Рэспублiкi Беларусь i Урадам Грузіі аб узаемных бязвізавых паездках грамадзян падпісана ў г. Тбілісі 22 сакавіка 2018 года і прадугледжвае бязвізавы ўезд і знаходжанне грамадзян Беларусі і Грузіі на тэрыторыі дзяржаў бакоў тэрмінам не больш за 90 дзён у каляндарным годзе з даты першага ўезду.

Уладальнікі дыпламатычных і службовых пашпартоў, прызначаныя на пасады супрацоўнікаў дыпламатычных прадстаўніцтваў, консульскіх устаноў або міжнародных арганізацый, вызваляюцца ад неабходнасці атрымання віз для ўезду, знаходжання, выезду або руху транзітам на працягу ўсяго перыяду іх прызначэння.

Палажэнні Пагаднення не вызваляюць грамадзян дзяржаў бакоў ад неабходнасці выконваць заканадаўства дзяржавы знаходжання, у тым ліку правілы рэгістрацыі і перамяшчэння замежных грамадзян.

У сваю чаргу ратыфікацыя і рэалізацыя палажэнняў Пагаднення паміж Урадам Рэспублікі Беларусь і Урадам Алжырскай Народнай Дэмакратычнай Рэспублікі аб адмене віз для ўладальнікаў дыпламатычных і службовых (афіцыйных) пашпартоў дазволяць спрасціць парадак узаемных паездак грамадзян Рэспублікі Беларусь і Алжырскай Народнай Дэмакратычнай Рэспублікі, якія маюць дзеючыя дыпламатычныя або службовыя (афіцыйныя) пашпарты, і нададуць новы імпульс развіццю двухбаковых сувязей у палітычнай, гандлёва-эканамічнай, гаспадарчай, ваеннай, навуковай і культурнай галінах.

Акрамя таго, парламентарыі прынялі рашэнне аб правядзенні парламенцкіх слуханняў на тэму «Прававыя і практычныя аспекты паляпшэння інвестыцыйнага клімату ў Рэспубліцы Беларусь».

Наступнае пасяджэнне Палаты прадстаўнікоў адбудзецца 31 кастрычніка 2018 года.