«Аб ахове і выкарыстанні тарфянікаў»

2 кастрычніка 2019 года Палатай прадстаўнікоў Нацыянальнага сходу Рэспублікі Беларусь прыняты ў першым чытанні праект Закона Рэспублікі Беларусь «Аб ахове і выкарыстанні тарфянікаў» (далей — праект Закона), унесены ў Палату прадстаўнікоў Саветам Міністраў Рэспублікі Беларусь.

Праект Закона распрацаваны ў адпаведнасці з пунктам 26 Плана падрыхтоўкі законапраектаў на 2019 год, зацверджаны Указам Прэзідэнта Рэспублікі Беларусь ад 4 студзеня 2019 г. № 4, у мэтах комплекснага прававога рэгулявання пытанняў захавання і рацыянальнага (устойлівага) выкарыстання тарфянікаў на ўзроўні заканадаўчага акта.

У праекце Закона закладзены прававыя асновы аховы і рацыянальнага (устойлівага) выкарыстання тарфянікаў у мэтах захавання іх асяроддзеўтваральных, водаахоўных і іншых функцый, задавальнення эканамічных і іншых патрэбнасцей цяперашнега і будучых пакаленняў у гэтых рэсурсах і рэалізацыі канстытуцыйных праў грамадзян на спрыяльнае навакольнае асяроддзе.

Праектам Закона вызначаны:

асноўныя прынцыпы аховы і выкарыстання тарфянікаў, якія ўлічваюць міжнародныя абавязацельствы Рэспублікі Беларусь і падыходы, закладзеныя ў Канцэпцыі нацыянальнай бяспекі Рэспублікі Беларусь;

правы і абавязкі землекарыстальнікаў і карыстальнікаў водных аб’ектаў, зямельныя ўчасткі і (або) водныя аб’екты якіх размешчаны ў межах тарфянікаў;

правы і абавязкі грамадзян пры наведванні тарфянікаў і ажыццяўленні імі права агульнага карыстання рэсурсамі тарфянікаў;

правы і абавязкі юрыдычных асоб і індывідуальных прадпрымальнікаў пры ажыццяўленні імі права спецыяльнага карыстання рэсурсамі тарфянікаў;

паўнамоцтвы службовых асоб і дзяржаўных органаў у галіне захавання і выкарыстання тарфянікаў;

рэжымы аховы і выкарыстання натуральных балот і іх гідралагічных буферных зон;

парадак устанаўлення меж тарфянікаў і гідралагічных буферных зон натуральных балот;

патрабаванні ў галіне аховы і выкарыстання тарфянікаў пры ажыццяўленні гаспадарчай і іншай дзейнасці;

пытанні экалагічнай рэабілітацыі тарфянікаў і другія пытанні ў галіне аховы і выкарыстання тарфянікаў.

Апрача гэтага ў праекце Закона ўрэгуляваны пытанні распрацоўкі дзяржаўных праграм, стратэгій, схем і другіх дакументаў у галіне аховы і выкарыстання тарфянікаў, кіравання імі, размеркавання тарфянікаў па напрамках выкарыстання ў гаспадарчай і іншай дзейнасці.

У сувязі з устанаўленнем рэжымаў аховы і выкарыстання натуральных балот і іх гідралагічных буферных зон праектам Закона прадугледжана ўнясенне змяненняў у Закон Рэспублікі Беларусь ад 26 лістапада 1992 г. № 1982-ХII «Аб ахове навакольнага асяроддзя».

Прыняцце праекта Закона Рэспублікі Беларусь «Аб ахове і выкарыстанні тарфянікаў» дазволіць стварыць прававыя асновы для захавання асяроддзеўтваральных, водаахоўных і іншых функцый натуральных балотных экалагічных сістэм, рацыянальнага (устойлівага) выкарыстання рэсурсаў тарфянікаў у гаспадарчай і іншай дзейнасці, а таксама будзе садзейнічаць найбольш поўнай рэалізацыі праў грамадзян на спрыяльнае навакольнае асяроддзе і агульнае прыродакарыстанне, а таксама выкананню Рэспублікай Беларусь абавязацельстваў па міжнародных дагаворах Рэспублікі Беларусь. З прыняццем Закона будуць ліквідаваны прабелы ў заканадаўчым рэгуляванні адносін, звязаных з аховай і выкарыстаннем тарфянікаў, сістэматызаваны нарматыўныя прадпісанні, што забяспечыць сістэмнасць і комплекснасць прававога рэгулявання адпаведнай сферы грамадскіх адносін.