«Аб далучэнні Рэспублікі Беларусь да Канвенцыі для забеспячэння міжнароднага адзінства і ўдасканалення метрычнай сістэмы»

19 лістапада 2019 года Палатай прадстаўнікоў Нацыянальнага сходу Рэспублікі Беларусь прыняты праект Закона Рэспублікі Беларусь «Аб далучэнні Рэспублікі Беларусь да Канвенцыі для забеспячэння міжнароднага адзінства і ўдасканалення метрычнай сістэмы», унесены Саветам Міністраў Рэспублікі Беларусь 11 верасня 2019 года.

Праект Закона распрацаваны з мэтай далучэння Рэспублікі Беларусь да Канвенцыі для забеспячэння міжнароднага адзінства і ўдасканалення метрычнай сістэмы, падпісанай у г. Парыжы 20 мая 1875 года (далей — Метрычная канвенцыя). Галоўнай мэтай далучэння Рэспублікі Беларусь да Метрычнай канвенцыі з’яўляецца стварэнне ўмоў для прызнання на міжнародным узроўні вынікаў вымярэнняў, якія выконваюцца на тэрыторыі нашай краіны.

Статус дзяржавы-ўдзельніка Метрычнай канвенцыі дае шэраг пераваг, у тым ліку права голасу на пасяджэннях Генеральнай канферэнцыі мер і вагаў, у якой да гэтага часу Рэспубліка Беларусь прымала ўдзел з абмежаванымі правамі. Паўнапраўны ўдзел краіны ў Метрычнай канвенцыі прывядзе да больш сістэмнага і комплекснага развіцця забеспячэння адзінства вымярэнняў. Дзяржавы-удзельнікі Метрычнай канвенцыі маюць магчымасць удзелу ў міжнародных параўнаннях нацыянальных эталонаў, што забяспечвае іх прызнанне на міжнародным узроўні, а таксама звяртацца ў Міжнароднае бюро мер і вагаў за кансультацыямі па пытаннях метралагічнай праследжваемасці, стварэння эталонаў і іх набыцця.

Праект Закона ў поўнай меры адпавядае сацыяльна-эканамічным патрэбам і магчымасцям грамадства і дзяржавы. Прыняцце законапраекта не створыць дадатковых адміністрацыйных і тэхнічных бар’ераў для грамадзян і арганізацый, не прывядзе да негатыўных сацыяльных і эканамічных наступстваў.