«Аб ратыфікацыі Пратакола аб унясенні змяненняў у Пагадненне аб парадку транзіту праз тэрыторыі дзяржаў — удзельніц Садружнасці Незалежных Дзяржаў ад 4 чэрвеня 1999 года»

10 кастрычніка 2019 года  Палатай прадстаўнікоў Нацыянальнага сходу Рэспублікі Беларусь прыняты праект Закона Рэспублікі Беларусь «Аб ратыфікацыі Пратакола аб унясенні змяненняў у Пагадненне аб парадку транзіту праз тэрыторыі дзяржаў — удзельніц Садружнасці Незалежных Дзяржаў ад 4 чэрвеня 1999 года», які ўнесены Саветам Міністраў Рэспублікі Беларусь.

Законапраектам прапануецца ратыфікаваць Пратакол аб унясенні змяненняў у Пагадненне аб парадку транзіту праз тэрыторыі дзяржаў — удзельніц Садружнасці Незалежных Дзяржаў ад 4 чэрвеня 1999 года. Дакумент падпісаны 31 мая 2019 года ў г. Ашхабадзе (Туркменістан).

Пратаколам актуалізуецца Пагадненне 1999 года ў мэтах прывядзення яго палажэнняў і тэрміналогіі, што выкарыстоўваецца, у адпаведнасць з Дагаворам аб зоне свабоднага гандлю ад 18 кастрычніка 2011 года, якім спрашчаюцца прававыя асновы гандлёва-эканамічных адносін паміж краінамі — удзельніцамі Садружнасці.

Пратаколам прадугледжваецца, што да ўказаных у артыкуле 3 Пагаднення тавараў і транспартных сродкаў, што іх перавозяць, не прымяняюцца меры эканамічнай палітыкі (абмежаванні на ўвоз і вываз тавараў, якія ўключаюць кватаванне, ліцэнзаванне, устанаўленне максімальных і мінімальных цэн, а таксама іншыя меры рэгулявання ўзаемадзеяння нацыянальнай эканомікі з сусветнай гаспадаркай), за выключэннем выпадкаў, вызначаных артыкулам 4 Пагаднення. У ім ідзе гаворка аб магчымасці ўстанаўлення нацыянальным заканадаўствам бакоў пералікаў асобных відаў тавараў, транзіт якіх забаронены, а таксама пералікаў асобных відаў тавараў, для транзіту якіх патрабуецца атрыманне спецыяльных дазволаў упаўнаважаных органаў бакоў.